EIN CONTE ED NOËL

Il étot ein' fos ein' belle pitite maison

Perdue au mitan d'ein' vaste clairière

Sin toit arcouvert ed neige à foison

Et s' queminée finquant ed belle manière.

A l'intérieur deux superbes pitis viux :

Li, aveuc ses caveux blancs et s'barpe in batalle

Elle, aveuc ein' sorte ed lumière dins ses yux

Qu'in aurot dit chelle qu'in vouot à travers ein vitral

.

Assis dins ch'cantou, i récaufottent leurs viux oches ;

Pont ein bruit si ch'n'est el crépit'mint d'ches étincelles

Et, au loin, ed l'alite côté d'el forêt, et son d'ein' cloche.

Mon diu quelle soirée de ch'réveillon allot ête belle !

Soudain, vlà-t'i pont qu'on intind buquer à l'porte.

In sursautant, alle li dit : « T'attinds quiqu'ein à ch't'heure ? »

-Mais non, qu'i l i répond, a-t-on vu buquer ed parelle sorte !

N'impêche qu'i va falloir ouvrir même si cha nous fait peur. »

Ein peu malgré li, i va ouvrir el porte, et quoiqu'i vouot?

Ein' espèce ed chorchelle mal artorquée

Qui li dit : « Min pauvr'homme, j'a faim, j'a gramint frod

Pouvez-vous m'héberger pour el nuit, partout in m'a arfusée. »

Bien qu' n'étant pont bien riches, i font ni ein' ni deux.

Elle, aveuc ses yux rayonnant ed lumière, alle met chel soupe à récauffer ;

Li, s'in va querre ein' bonne miche qu'i cope in deux

Fins bénaches de n'pont, ch'réveillon tout seus, passer.

Ein peu plus tard, i z' installèrent ein' paillasse devant l'queminée.

Toute arcrinquée, el pauf' femme alle s'installa devant ch'fu

Et in deux temps tros mouv'mints s'mit à ronfler.

« Si c'est pont malheureux, c'qu'alle a mingé ! T' as vu ? »

El lendemin, il faijot cor nuit, quand note rescapée alle ouvrit l'porte.

Allle leu dit : « Personne n'a jamais fait pour mi cho qu' vous avez fait ;

Quand l'jour se lèvera, ravisez vot' gardin, et que personne i sorte. »

Pis alle disparut comme al étot vénue, laichant nuos viux éberlués.

Adon, au l'ver du jour , i z'ouvrirent  et restèrent estomaqués.

Edvant leu mason, dins   l' neiche, pont ein' trace ed pas mais des pattes ed moniaux

Et, in les suivant, i virent ein rouche-gorche perché sur leur unique rosier.

I étot arcouvert ed grosses roses rouches, el jour ed Noël, ch'est cha et plus biau!

O m'creurez si qu'o voulez, mais chaque année, et jour ed Noël

Leu rosier arfleurit. I donne des supepbes roses rouches.

Ch'est sans doute cha qu'on appelle des rosses ed Noël !

In les vot dins lumière ed ses yux surtout quand i bougent !