1. Je l'ai toudis proclamé haut et fort,

Jamais, dins ein ordinateur, je mettros min nez.

Et ben, mes amis, j'avos rud'mint tort

Min beauf Raymond, mine d'arien, i y est arrivé.

2. C'pindant, dins ch'domaine-là, j'séros putôt sous-doué.

Malgré mes réticinces, aveuc gramint d'opiniât'té

I m'a toudis, sans arlâche, tout espliqué.

Dé l'pacinche, i n'y a fallu, car pour mi ch'est cor fort compliqué.

3. Faut dire qu'i a eu ein' idée d'génie.

In douce, ein biau jour, il m'a amené dins ein' mairie

Et là, i m'a fait vir les débuts de m'généalogie.

E d'pis, j'sus aussi inragé qu'li.

4. Ein' fos qu'nous archerches al z'ont abouti,

D'ein logiciel, bien évidemmint, in s'a servi.

Qui dit logiciel, dit bien intindu ordinateur.

O avez compris s'n'idée première, à ch't'heure ?

 Raymond et Max aux Archives d'Arras

5. Et à chaque fos qué m'n'ordinateur, in panne, i quet

Ch'est cor li qui vient m'dépanner.

Jé m'demande bien cho que j'féros sans li

Car je n'comprinds, hélas, rien à tout ch'fourbi.

6. V'là qu'à ch't'heure i m'réapprind l'patois,

I rectifie mes poèmes, i corriche mes fautes.

Aveuc ein professeur comme li, in artreufe vite el foi.

Faut vir el boulot qu'i fait aveuc Cathy, dsus l'site Nouzautes.

7. Adon, tous les quinze jours, in s'in va à Arras,

A l'préfecture, in farfoulle dins ches paprasses

Et quand, parfos, al longue, je m'lasse

Ch'est li qui est là, pour m'assister, i n'est pont toudis à l'ducasse.

8. Ed pis qu'in s'fréquente, j'sais qu'pour tout, j'peux compter dsus li.

A ch't'heure, i est dév'nu bien pus qu'ein ami.

El mot biau-frère, pour mi, i n'convient pus

A m'mode que frère, tout seul, cha sérot gramint miux.