Ch'ti qu'in app’lot min père,

In dit qu'ches absents i z'ont toudis tort.
Ch'ti qu'in app’lot min père, il l'a été pus d’six ans.
Et pétête bien qu'i y serot cor
Si ches Américains i z''étotent pont v'nus bien avant.

J'n'a jamais été aussi heureux dé m’vie
Qu'durant ches six années-là,
Seul maîte à bord, j'faijos tout ch'que j'avos invie.
I avot faut que m'mère qui, timps in timps, mettot sin holà.

Que j'fache ein' bêtisse, que j'diche ein gros mot
Que je ne veuche pont minger m'soupe, pour n'importe quoi
Al savot rabâcher qu'huit mots :
"Gare à tin père, quand i séra là ! "

Aussi, à m'mère, j'li in ai toudis voulu
Ed m'avoir fait détester min père, bien avant d’l'avoir connu.
A forche d'intinte seriner ch'elle rengain-ne
Ch'étot pus d'el rache, ch'est vite devenu de la haine.

Adon, pour mi , i arprésentot l'impêcheux ed'tourner in rond
Ch'père fouettard, ein' sorte ed chorchelle
Ein' espèce ed viux ronchon
Qui allot brader m'vie pourtant, alors, si belle.

J'a honte de l'dire, mais j'voulos qu’la guerre al s'arrête jamais ;
Qu'i resse, là-bas, à traire ses vaques, à sémer du blé
Pisque, aussi bien, ch'étot dins ein' cinse qu'i étot prijonnier.

Malheureus’mint pour mi, sin jour ed gloire i est arrivé.
J'l'ar'vouos cor, sur l'quai de l'gare,
Sin calot à deux pointes dsus s'tête, s'musette à sin cou accrochée
Ses bantes molletières et pis surtout s'n'air goguenard

Ein' façon ed dire, comme ein'autre, attintion, el fête est terminée !
Ch'est comme cha que je l'ai vu, aveuc les œillères de m'mère.
Pasqu'in fait, i n'devot pont ête si méquant qu'cha
Mais l'mau i étot fait, impossipe ed faire marche arrière.

Dins m'pitite chervelle ed moniau ch'loup-garou i étot là.
C'pindant, au début, des efforts i n'a fait.
Mais mi, sans cesse, j'les a tous arpoussés.
Je n’me sintos bien que quand i n'étot pont là.

I s'in est vite rindu compte, et ses essais i z’in sont restés là.
Alors là, cang'mint ed cap, i s'a mis franchemint à m'détester.
Chaque parole qu'i prononchot, al étot faite pour m' blesser
M' rabaisser, m' torturer surtout in société.

I n’m'a jamais tapé, i a fait pire, i m'a " lobotomisé "
Em'mère al est jamais vénue à min s'cours
Al li a laiché faire sin traval ed destruction.

Seule em'grand mère al intervénot tous les jours
J'éproufe, pour elle, ein' véritape vénération.
Alors, quand min frère i est né, final'mint j'étos heureux
L'timps qui ponchonnot sin pouchin, i m'foutot la paix.

Ch'étot forchémint li ch'pus biau, ch'pus sach', ch’pus amiteux
A partir de ch'momint-là, j’cros, qu’dé s'vie i m'a " zappé ".
I faijot ch’ti qui m'connot pont, mais in loucedé
In famille, i lâchot des vannes du genre : " Min pouchin i est premier
Et l'aut', pour pont canger, i ar'est collé. "

Faut dire qu'au lycée, j'a tout fait pour l'embêter.
Ch'est à s'deminder commint j'a pu finir professeur d'ches écoles.
Un sursaut d'orgueul, ein' fierté personnelle
L'plaiji d'li faire vire qué j'pouvos y arriver sans s'n'obole

Mais m'grand mère al étot si heureusse, j’l'a fait avant tout pour elle.
L'atmosphère devenant irrespirape, bien vite je m'sus marié
Et nos quémins i s'sont séparés.
A vrai dire, i s’sont-i jamais rapprochés ?

Toudis est-i qu'j'a pris enfin m'invol, m'liberté
D’timps in timps j'allos cor les vire (surtout m'grand-mère)
Mais aveuc li ch'est toudis resté glacial : l'frod polaire.
Tout cha à causse de ch'fameux " gare à tin père ! "

Si in savot l’mau que quate mots i peuv'tent faire !
Quand i est mort, je n'sus pont allé à s'n'interremint.

J'n'in sus pont fier o pouvez in êt' certains.
Mais jamais j'n'auros pu aller mett' in terre
Un hom-me qui, au grand jamais, n'm'avot eu querre.

I a des années de cha, achteure, mais j'y pinse toudis
L'écrire cha m’éra servi ed thérapie.
I m'arrive souvint ed passer à l'chimintière
Et jé m'dis : " Et si i avot pont eu ch'el maudite guerre !"

Tout i aurot été différent
J'éros eu ein vrai père
Ch'est cha qui m'a manqué tout ch'timps.
Arposse in paix quand meim-me " min père ".