Excusez- me d'vous d'minder pardon,

Mais je n'sus qu'un viux, ed cheux qu'in n'veut pont

J'l'a intindu, l'aut'jour, à l'télévision,

Au cours d'ein certain nompe d'émissions.

« J'l'élimine pasqu'i est trop viux.

Ch'est pont de s'faute, cha n'est qu'un viux.

Quoi qui fait cor là ch'viux !

Plache à ches jon-nes, haro edsus ches viux ! »

Ch'est tout au moins l'avis d'ein' partie de l'foule.

Mi, quand j'les intind, cha m'fout les boules.

L'ont oublié, chelle binde ed maboules

Qu' pour eux aussi, el vie al roule.

 Si in les laichot faire,

I férotent comme Hitler

In nous ramass'rot par rues intières

Et in nous inverrot derrière ein ridiau d'fer.

Et pis, ed timps in timps, on in sortirot ein à l' télévision

Et in dirot : «Ch'est ein'espèce in voie ed disparition.

Ravisez-le bien, n' faites pont attention

I est bien au caud, edsous nou protection. »

Là, o z'allez dire qu'j'exagère !

Mais ch'n'est pont l' invie qui manque, à certains, de l'faire.

J'connos in mouv'mint qui naguère

A comminché comme cha, sans n'avoir l'air.

Excusez- me d vous d'minder pardon

Mais je n'sus qu'un viux, ed cheux qu'in n'veut pont

J'espère bien qu' j'érai eu raison

D'armette leu chervelle à plache, à certains p'tits c... s !