Min grand-père

Ch'est à Paris un bieau matin

In mille neuf chent qu'i étot né

D'père inconnu et l'sort voulut

Que ch'matin-là, s'maman al mourut

Et à tros jours le v'la chez nous

Àmon des pauv'gins qui, pour quèques sous

L'avotent pris, mais sins invie

L'braffe Mélanie quand al vint l'vire

Treuva ein pauffe tiot anémié.

Pour à s'mason arteurner

Ch'est dsous sin bras qu'al l'a muché

Al l'avot querre com-me sin pitit à elle

I étot enfin heureux vraimint

Et ch'est dins l'rue qu'i a appris

Qu'in l'appelot ch'ptit parisien.

Mais ch'est dins l'nord qu'i a grandi

Serviape, joyeux et sins mépris

Pour cheux-là qui, par jalousie,

Dijottent qu'i n'étot pont du pays.

Com-me gramint d'hom-mes dins nou région,

I est déchindu au fond dé l' fosse

Pis i a ouvré au magasin

D'ein' usine qu'y avot dins sin coin

Mais l'hom-me ch'étot ein personnache

Dins m'mémoire, y a gravé l'imache

D'ein p'tit viux à caveux tout blancs

Qui boitot suite à ein accidint.

Des malheurs i n'avot connus

Dins sin argard d'nouvieau né

In percevot ein' grante tindresse

À tous ches infants du quartier

Chétot l'confident et l'ami

In l'suivot tout partout et toudis

À ch' gardin com-me à ch'l'établi

Tout ch'qu'in sait, i nous l'a appris

Ch'étot l'pilier de l'mason

Si j'vous disot in y pinsant

L'tro qu'i a fait in nous quittant.

Ch'est grâce à li si aujord'hui

In patois j'peux écrire chechi

Aussi j'voulos, dins sin parler,

Li rinte hommache à m'façon

Li dire merci d'm'avoir donné

L'amour du biau, du bon, du vrai

Et aussi l'amour d'un pays

Qui n'étot pont tout à fait l'sien

Françoise SIMON DUPOND