M'lette à Père Noël

 

Min pauffe Père Noël, ed'pis l'timps que j'té connos, j'peux t'dire que j'sus fort mag'mint de ch'qui t'arriffe ! Mi, j't'a connu, y a quèques années (pour tout dire...y a soixante chinq ans, cha n'nous rajeunit pont !), quand té vénos à l'Cité des Mines dé l'Pugnoy. Nous parints i faijottent des mystères au soir du 25 décembre : fallot ête bien saches, fallot s'couquer d'bonne heure et, surtout, pont raviser quand qu't'allos vénir. Et d'nous raconter commint qu't'allos déchinte par l'quéminée pour nous mette nous cadeaux ( intre nous, t'étos pont fort riche à l'époque, ch'étot l'pus souvint eine oranche, des chuques et ein tit jouet in bos). A don, ches masons alles avottent tertoutes des fux à carbon et ch'étot facile pour ti d'passer par ch'buot, mais j'a jamais compris commint qu'tin baudet i mingeot l'carotte qu'in avot mis pour li !

A ch't'heure, j'a tros pitits éfants et j'douos t'dire qu'i rigol'tent comme des bochus quand j'leu raconte mes anciens Noëls ! D'abord, i n'savent pus cho qu'ch'est eine queuminée, vu qu'à leu mason, y a l'chauffache central. Allez leu espliquer commint qu'o faijez pour déchinte ches jouets. Ch'pus grand i m'a mein-me fait vir tin traîneau à fusées, s'il vous plaît.

Et pour ches jouets, alors là, pardon ! Ches garchons, i n'rèf'tent que d'robots qui marchent, qui dansent et mein-me qui ramass'tent des trucs et qui peuf'tent les lancer, ou bien des autos télécommindés et autes ordinateurs ! Non, mais, Père Noël, t'as vu commint qu'in t'arrinche : ach't'heure, t'as des cataloques rimplis d'plein d'machins qui march'tent à piles (rechargeapes, naturell'mint, mais i faut acater ch'chargeur) ou bien d'jux bizarres (mais " adaptés à l'âge et à la personnalité de l'enfant ", comme ch'est dit dins ches prospectus qui comminchent à implir ches boîtes à lettes). Bref, i t'ont fait dév'nir un commerçant. D'nou timps, ches garchons i juottent aveuc des autos, des toupies ou bien des soldats d'plomb (qui sont dév'nus des pièches d'collection, tell'mint i s'font rares !).

J'sais bien cho qu'in va m'dire : i faut vife avec sin timps et in sommes dins l'ère d'l'électronique. Ch'est pétête vrai, mi je n'sus pont conte l'progrès, mais avouez qu'i a d'l'abus : quand j'vouos mes pitits, je m'dis souvint qu'i n'ont tellemint, qu'i s'mettent pus à rien et ches jouets, cha valse ed tous les côtés et, in fin d'compte, quo qui z'ont appris ? Pont grand cosse, ah si....à canger ches piles !

Et pour ches files, o z'avez vu l'traval ? Et des poupées qui ont l'tête d'ches canteuses d'la Star Ac' par chi, et des autes qui z'ont " toute la panoplie ", y compris ch'bidet aveuc des longs caveux par là. Là, in r'vinche, l'progrès i n'a pont suivi : i a toudis l'batt'rie d'cuisine aveuc ches accessoires pour faire à minger à papa et tout cha qui faut pour laver et arpasser ch'linche !

Té vouos, Père Noël, t'as pétête eu tort d'les laicher faire, pasqu'à ch't'heure, ches pus des menuisiers et des peintes qui t'faut dins n'atelier d'fabrication d'jouets, mais des électroniciens ! Mais, ch'est pont de t'faute, t'étos tout seul, et les autes i sont grammint à vouloir vinte à tout prix ! Et l'pire (et j'diros mein-me l'pus pire, comme in dit in ch'ti dins nou coin) là'd'dins, ch'est qu'i faut d'pus in pus d'sous pour faire plaiji à ches jon-nes et là, i a pont eu d'progrès, cha sérot putôt l'contraire.

Mi, ch'cros cor qu't'existe, Père Noël, mais i faut dire qu'dins m'tiète....j'a pont pus d'dix ans ! J'a biau avoir un ordinateur, j'm'amusse cor, aveuc mes pitis, à jéter des caillaux dins l'iau, à juer au foteballe ou cor à cache-cache, comme dins l'timps. Et j'té jure qu'à ches momints-là, tous ches manicraques électroniques, i n'existent pus.

Alors, Père Noël, cros-me, t'es pont tout seul et je n'te deminte qu'eine cosse : continue à faire rêver nous pitits.et ches grands, i n'ont grand bésoin in ch'momint. Et n't'in fais pont, j'a cor l'goût d'tes oranches dins m'bouque mais, escusse-me, je mettrai pus d'carotte pour tin baudet, al sont in-mingeapes et pis j'a pus d'gardin!