El pinsion d’ech Juyen

 « Bonjour Monsieur l’ingénieur »    

« Bonjour Julien ! »  

Julien Lefebvre , tout in tortinant sin béret  du diminche inteur ses viell’s mains machuquées, mile  du coin d’l’oeul  Monsieur  Salins  l’ingénieur d’ech puits d’fosse   Saint Nicolas à Cauchy à la Tour.  

Ch’est  Diminche, jour d’nou Seigneur , ch’ Ju-yen i est v’nu à pied d’sin villache ed Valhuon pour assister à l'grand messe à l’église ed Cauchy.  Ch’est pont qui ni crot  cor  à  ch’bon Diu , mais in sait ti jamais... Et pis ch maît’e porion d’eul fosse ed Saint Nicolas, d’ù qui travalle,  i étot à s ‘n’habitude d’sous l’portal  à l’intrée d’l’église, à pointer ches ouveriers d’eul fosse . Ch’Ju-yen cha n’i f’ra un bon point que ch’maît’e  i l’o aperchu. Faut qui busie  pour s’pinsion., Ju-yen.... Et pis y a aut’e causse qui l’tracasse… Ch’est pour cha qui s’est arringé pour s’treuver d’zus l’kemin de Mr l’ingenieur.

D’habitude I n’a pont trop querre de s’faire armarquer , i est pont ainsi qu’sin père- Sin père ech’tot  un sapré zique. I étot marqué au rouche.  I s’étot fait r’marqué,  à ch’puits d’Saint Nicolas  . I avot foutu d’sus la gueule d’ech porion qui avot mis à bas eine berline   in prétextant qu’i avot d’eul tierre ed dins. Tout l’fosse savot que ch’ tot li, ch’te sale biête ed porion , qui d’timps in timps  jech’tôt des pugnies d’tierre  ed’dins ches  berlines. Surtout quand qui n’avot  eine dint cont’e ech chef d’eine   équipe d’abatteus  qui li, bien sûr,  l’avot dins l’nez. … Ch’maît’e i dijot qu’cheulle berline n’étot pont valab’e, car n’y avot d’eul tierre ed d’dins. Alle n’étot  donc point payée  à  ch’l’ équipe.  Ch’cop  lo , Firmin sin père à ch’ Ju-yen,   i avot surprind ch’maît’e  in pleine action . Adon I  avot point pu artenir sin poing d’partir. Evidemmint, Firmin, i avot té rinvoyé.  Mais tout l’fosse alle s’étot mis in grève par solidarité . Firmin lu z’avot dit d’arrêter cha , qu’euch tot pont  l’momint d’faire grève  , i avot du stock  .     Et pis ech chef ed criblache , un comarate d’école, i avot dit à Firmin qu’les choses alles pouvottent s’arringer…

« Te sais Firmin,   ch’maît’e , i est pont forchemint bin vu, par ech directeur , Monsieur D’ Laruffit.  Vas donc vire Monsieur l’Marquis . Espique z’i  t’situation… Qu’t’as onze tiots à nourrir . . Fais te tout peteux …Fais  comme si qu’t’allos t’mett’e à braire.  Sors tin mouchoir de t’poche ed patalon ; et fais kerre  ech’cap’let  qu’t’éras mis in d’sous… Te verras les choses alles s’arring’ront… » Ch’père i avot fait ainsi qui avot dis sin comarate … I avot été rimbauché…

Mais, quand même ,ed’pis ch’timps lô, in peut  dire qu’ ches Lefebvre i z’étottent arpérés. Tous ches porions i s’in méfiotent d’eusses!  Pourtint in n’pouvot point gramint  s’in passer d’ches Lefebvre dins ches fosses d’ù qui z ‘étotent imbauchés… i z’avettent inne espécialité . I s’y connaichottent  vraimint fort bin dins ches bidets. I z’in  savotent  gramint  d’zeur ches k’vaux . D’abord par tradition ed famill’ , dins l’ferme ed Valhuon  qui étot l’berche  d’eul famill, in el’vot des boulonnais d’pis au moins quat’e générations. Et cha faijot l’doup’e qu’ches Lefebvre i z’étotent palfreniers ou marichaux . Adon quind qu’ches  fosses  alle  s’étotent ouvertes autour d’Auchel , in avot eu  b’son d’bons  bidets . Tout naturell’mint ches « espécialistes in bidet », z’avettent été consultés par ches vétérinaires d’ches fosses . Si bin que d’certains cinsiers z’avettent c’minché à faire fortune in vindant des bidets  à ches compagnies … et  d’z’autes , comme ches Lefebvre ed Valhuon, z’avettent treuvé d’l’ouvrache  dins ches puits. Particulier’mint ches cadets d’famill’  qui n’pouvettent point hériter d’eul cinse familiale ou seulmint d’inne tiote parcelle… adon dev’nir garde ed bidets  ou meneux kévaux   dins ches fosses cha mettot du beurre dins z’ épinards … même que Ju-yen i avot pu s ‘marier  . Bin sûr i fallot faire la route tous les jours ed Valhuon  à l’fosse  Saint Nicolas. Mais   ma pinse quo qu’cha n’est 2 lieux à pieds !  In partant à 4h au matin Ju-yen i arrivot à l’heure pour el première déchinte. Et pis du même au soir, après 10h ed traval. I rintrot à Valhuon vers 20h . Cha n’l’impéchot pont d’aller  cor donner un cop d’main à l’forge ed sin frère Gustin si qui n’y avot  foque  inne paire ed bidets ou d’bœufs à ferrer.  Ch’manèche lo durot d’pis betôt  40 ans , par tous les temps : pleuv’s, frod à pierre finde, neiche, noirglas ; au mitant de z’ernus  d’ches caleurs d’août.  Mais aussi dins les doucheurs ed mai juin , les sintimints  des blanques epines   au bord des k’mins creux ,  d’ù qu’in faijot  indever